نسابق الأيام يومٍ بعد يوم = كنٌا نبي نعمٌر دهورٍ واعوام
والبعض يمضي وقته بضيق وهموم = وإن فاته شيٍ يقضي اليومِ منضام
كم موقف وموقف غدت كنها حلوم = وكم شخص جافيناه من بين الأخصام
وكم من عزيزٍ ذله انجاس ورخوم = دارت دوايرها وداسته الأقدام
وكم من وضيعٍ نافس زحول وقروم = كثرت فلوسه حط له زود خدام
واحدٍ سواة الحر واحدٍ كما البوم = والحر يكفخ بالجناحين لاحام
ياسعد من له وقت في الليل معلوم = يناجي ربٍ خالق الكون بإحكام
سخره ربي لكل بائس ومحروم = في الخير وفعله دوم بصمة ابهام
ولأقاربه يشري ولو زادو السوم = يحرص على القربى على وصل الأرحام
ياالله تبعدنا عن العيب واللوم = وتفكنا من كل موذي ونمام
وتكتب لنا التوفيق في دايم الدوم = مع كل من صلى وزكى ومن صام
( احمد بن ناصر المحرج )