يالله يالله تمّنا وتحمينا = من جور الأيام وغدر النّاس ياكافي
يالله يالله لاتخيّب مساعينا= يامن بأمرك يكون الكاين الخافي
أنّك على الحق ترشدنا وتمشينا= وتنصف لنا والزّمن به ميل ونصافي
وعلى طريق الهدى بهداك تهدينا= وتمّن علينا بيوم منه ينخافي
يستافي الوقت والأيام تفنينا= وهذا بهاء راحل وهذاك به لافي
يخون فينا الزّمن مهما يصافينا= ونشوف ميل الزّمن ولا أحدٍ منه عافي
شدّت باللي قبلنا وله عودةٍ فينا= ومخالب الوقت للأعمار مخطافي
واللي مضى من الزمن ماهو بكافينا= وقطار ركب الزمن يمشي بنا قافي
ومطامع النّفس تنسينا وتشقينا= وسبور الأيّام ماتعلّم ولا تشافي
ونزعل ونرضى وحنا ما ترضينا = ونبكي ونضحك ودمع العين ذرّافي
والأرض من تحتنا تحفي مواطينا = وندوس شوك الصحاري والقدم حافي
ونعاند الوقت وأياّمه تعادينا = والوقت به مبتدي وهذاك به طافي
دنياك دنيا الشقاء تبرم حوالينا = له هجمة ٍ تصحي اللي جاهلاً غافي
قبل أمس شعب لأبو متعب يواسينا = واليوم شعب الجزيرة قاده الوافي
سلمان سلمان ياقلنا وعدّينا = هجن المروّه يقوده ثقل وخفافي
ملك على العدل يأمرنا ويوصينا= واليا وعد بالوعد يافي ويستافي
وحنّا بأوامر ملوك العدل والدينا= شعبٍ لهم وافيٍ من ماض ألأسلافي
وأنا أدري النّاس باللي قلت دارينا = والنّاس مثلي تعرف الظّل والدّافي
يالله بلطفك نهار فيه خلينا = القبر من فوقنا يسفى به السافي
من حوض نبيّك نهار الحشر تسقينا =وتظلنا بظل عرشك يوم ألأنصافي
وختمت ما برمج التّفكير ونهينا = صلوا على محمدٍ في منتهى قافي